काठमाडौं । अख्तियार दुरूपयोग अनुसन्धान आयोगले नेपाली कांग्रेसका नेता एवं निर्वतमान प्रतिनिधि सभा सदस्य सन्तोष चालिसेविरूद्ध आज विशेष अदालतमा भ्रष्टाचार मुद्दा दायर गरेको छ। सार्वजनिक पदमा रहँदा पदको दुरूपयोग गरी गैरकानुनी रूपमा सम्पत्ति आर्जन गरेको अभियोगमा आयोगले उनीविरूद्ध मुद्दा दर्ता गरेको हो।

विशेष अदालतका सूचना अधिकारी यज्ञराज रेग्मीका अनुसार आयोगले सांसद चालिसेविरूद्ध ३ करोड ६८ लाख ४७ हजार ७ सय ६१ रुपैयाँ बिगो कायम गरी आरोपपत्र दायर गरेको छ। चालिसेमाथि २०७४ सालको स्थानीय तह निर्वाचनमा काठमाडौंको गोकर्णेश्वर नगरपालिकाको मेयर निर्वाचित भएर कार्यभार सम्हाल्दा अकुत सम्पत्ति जोडेको गम्भीर आरोप लागेको छ। स्थानीय तहको नेतृत्वमा रहँदा उनले आर्जन गरेको सम्पत्तिको वैधानिक स्रोत नखुलेपछि अख्तियारले लामो अनुसन्धानपश्चात् विशेष अदालतमा मुद्दा अघि बढाएको हो।

हाल सङ्घीय संसदको प्रतिनिधि सभा अन्तर्गतको महत्त्वपूर्ण मानिने ‘अर्थ समिति’ का सभापति समेत रहेका चालिसेविरूद्ध भ्रष्टाचारको मुद्दा दर्ता हुनुलाई गम्भीरताका साथ हेरिएको छ। उनी २०७९ सालको प्रतिनिधि सभा निर्वाचनमा काठमाडौं क्षेत्र नम्बर ३ बाट निर्वाचित भएका थिए। सो निर्वाचनका क्रममा पार्टीको क्षेत्रीय समितिले उनलाई एकल उम्मेदवारका रूपमा सिफारिस गरेको थियो, जसले पार्टीभित्र उनको बलियो पकड रहेको दर्शाउँछ।