बेलौरी, कञ्चनपुर । नेपाल कम्युनिस्ट पार्टी (एमाले) को ११औँ राष्ट्रिय महाधिवेशनबाट अध्यक्ष पदमा केपी शर्मा ओली भारी मतसहित तेस्रो कार्यकालका लागि निर्वाचित भएका छन्। बिहीबार सम्पन्न मतगणनाको अन्तिम परिणामअनुसार, प्रतिस्पर्धी ईश्वर पोखरेललाई फराकिलो मतान्तरले पराजित गर्दै ओलीले पार्टी नेतृत्वमा आफ्नो वर्चस्व कायम राखेका हुन्।

काठमाडौँको भृकुटीमण्डपमा भएको निर्वाचनमा अध्यक्षका उम्मेदवार ओलीले १६ सय ६३ मत प्राप्त गरे भने उनका निकटतम प्रतिस्पर्धी पोखरेलले ५ सय ६४ मत मात्रै प्राप्त गर्न सके। त्यसैगरी, पार्टीको दोस्रो कार्यकारी पद महासचिवमा शंकर पोखरेल १२ सय २८ मतसहित पुनः विजयी भएका छन्। कुल १९ पदाधिकारीमध्ये १७ पदमा ओली पक्षीय उम्मेदवारहरूले जित हासिल गरेपछि पार्टीको आन्तरिक सत्तामा संस्थापन पक्षको पूर्ण पकड देखिएको छ।

उपाध्यक्ष पदको प्रतिस्पर्धामा पनि ओली प्यानलकै वर्चस्व देखियो। पृथ्वीसुब्बा गुरुङ (१७३७ मत), विष्णुप्रसाद पौडेल (१६७५ मत), रामबहादुर थापा ‘बादल’ (१५१६ मत) र रघुजी पन्त (१२५८ मत) विजयी भएका छन्। पोखरेल प्यानलबाट उपाध्यक्षमा गोकर्णराज विष्ट (१३६८ मत) मात्रै निर्वाचित हुन सफल भए। उपमहासचिव पदमा सुदूरपश्चिमका प्रभावशाली नेता लेखराज भट्टसहित योगेश भट्टराई र रघुवीर महासेठ विजयी भएका छन्। भट्टले १४ सय ५२ मत प्राप्त गर्दै आफ्नो प्यानलमा दह्रो उपस्थिति देखाएका छन्।

सचिव पदका नौ सिटमा पनि ओली पक्षकै स्पष्ट बहुमत देखिएको छ। जसमा महेश बस्नेत १५ सय ४४ मतका साथ पहिलो स्थानमा रहँदा पद्माकुमारी अर्याल, छविलाल विश्वकर्मा, शेरधन राई, हिक्मतकुमार कार्की लगायतका नेताहरू निर्वाचित भएका छन्।

पार्टी विधानमा गरिएको पछिल्लो संशोधन र नेतृत्व चयनको यो परिणामले एमालेभित्र केपी शर्मा ओलीको नीति र नेतृत्वलाई कार्यकर्ताले पुनः अनुमोदन गरेको सन्देश दिएको छ। निर्वाचनमा विद्युतीय भोटिङ मेसिनको प्रयोग गरिए पनि प्राविधिक कारणले गणनामा केही ढिलाइ भएको थियो।