बेलौरी, कञ्चनपुर। आगामी फागुन २१ गते हुने प्रतिनिधिसभा निर्वाचनका लागि नेपाली कम्युनिष्ट पार्टी कञ्चनपुरले प्रत्यक्षतर्फका उम्मेदवारहरूको नाम सिफारिस गरेको छ । जिल्लाका तीनवटै निर्वाचन क्षेत्रबाट आकाङ्क्षी उम्मेदवारहरूको नाम छनोट गरी पार्टीले माथिल्लो कमिटीमा पठाएको हो ।
निर्वाचनको मिति तय भएसँगै जिल्लामा राजनीतिक गतिविधि बढेको छ । यसै क्रममा कञ्चनपुरको निर्वाचन क्षेत्र नम्बर १ बाट पार्टीले प्रभावशाली नेत्री वीना मगरसहित आठ जनाको नाम सिफारिस गरेको छ । उक्त क्षेत्रबाट मगरका अलावा लोकेन्द्र प्रसाद लम्साल, भक्त बहादुर अधिकारी, कृष्ण राज गिरि, जीवनराज थापा, तिलक भट्ट, दीपक वि.सी. र मदनसेन बडायकको नाम सिफारिस सूचीमा समेटिएको छ ।
त्यस्तै, निर्वाचन क्षेत्र नम्बर २ बाट लाल बहादुर खड्का, जयराज पाण्डेय, हरिष ठकुल्ला (कमल क्षेत्री), माधव प्रसाद पन्त, महेश दत्त जोशी, दुर्गा जोशी भट्ट र तोयराज जोशी गरी सात जनाको नाम अगाडि सारिएको छ । पार्टीले भूगोल र समावेशितालाई ध्यानमा राख्दै उम्मेदवारहरूको नाम सिफारिस गरेको देखिन्छ ।
सदरमुकाम महेन्द्रनगर र आसपासको क्षेत्र समेटिएको निर्वाचन क्षेत्र नम्बर ३ बाट भने पाँच जना नेताहरूको नाम सिफारिस भएको छ । यस क्षेत्रबाट मान बहादुर सुनार, हरक सिंह धामी, दिपक सिंह साउँद, खेम बहादुर भण्डारी र राजिव दमाईको नाम सिफारिस गरिएको छ ।
उम्मेदवार सिफारिस सम्बन्धी यो जानकारी नेपाली कम्युनिष्ट पार्टीका नेता सहबिर सुनारले दिनुभएको हो । सुनार साविक माओवादी केन्द्रको जिल्ला सचिवको जिम्मेवारीमा रहनुभएको थियो । जिल्ला तहबाट सिफारिस भएका यी नामहरूमध्येबाट पार्टीको केन्द्रीय तहले अन्तिम उम्मेदवारको टुङ्गो लगाउने बताइएको छ ।
प्रतिक्रिया
सम्बन्धित खवर
