कञ्चनपुर, १५ कार्तिक । कञ्चनपुरको कृष्णपुर नगरपालिका-२, वाणिस्थित पूर्व-पश्चिम राजमार्गमा आज बिहान बस पल्टिँदा एक जनाको मृत्यु भएको छ।
जिल्ला प्रहरी कार्यालय कञ्चनपुरका अनुसार, काठमाण्डौबाट महेन्द्रनगरतर्फ जाँदै गरेको ना ७ ख ६१८२ नम्बरको बस आज बिहान अन्दाजी १० बजेको समयमा सडकको बाँया साइडमा पल्टिएको हो।
दुर्घटनामा परी बसमा सवार कृष्णपुर नगरपालिका-१, बण्ड बस्ने अन्दाजी ४२ वर्षीय बल बहादुर बोहरा गम्भीर घाइते भएका थिए। उनलाई उपचारका लागि तत्काल वाणि अस्पताल लगिएकोमा उपचारकै क्रममा मृत्यु भएको प्रहरीले जनाएको छ।बसमा कुल ५ जना सवार रहेको बताइएको छ।
बस चालक कञ्चनपुरको दैजी बस्ने अन्दाजी ४० वर्षीय रमेश बोहरालाई प्रहरीले नियन्त्रणमा लिएको छ। दुर्घटनाको कारणबारे थप अनुसन्धान भइरहेको प्रहरीले जानकारी दिएको छ।
प्रतिक्रिया
