केशव भट्ट, पौष ४, बेलौरी। रामलीला समिति बेलौरीले आय-व्यय सार्वजनिक गरेको छ। समितिले कार्तिक २० गतेदेखि मंसिर २ गतेसम्म बेलौरीको खुला मञ्चमा रामलीला मञ्चन सञ्चालन गरेको थियो।

बिहीबार आयोजित पत्रकार सम्मेलनमा समितिले आय-व्यय सार्वजनिक गरेको हो। रामलीला समितिका कोषाध्यक्ष महेन्द्र सिंह बुडालले रामलीलामा भएको आम्दानी र खर्चको विवरण सार्वजनिक गरेका हुन्।

रामलीला मञ्चनमा आम्दानीतर्फ १२ लाख ४८ हजार ४१६ रुपैयाँ र खर्चतर्फ ७ लाख ४२ हजार ८३१ रुपैयाँ रहेको, जसबाट बचत ५ लाख १५ हजार ५८५ रुपैयाँ भएको समितिको सार्वजनिक प्रतिवेदनमा उल्लेख छ।

पत्रकार सम्मेलनमा रामलीला समिति बेलौरीका अध्यक्ष दिनेश कुँवरले लामो समयपछि बेलौरीमा रामलीला मञ्चन भव्यताका साथ सम्पन्न भएको बताएका छन्।