बेलौरी, कञ्चनपुर, ८ असार। बेलौरी नगरपालिकाले आगामी आर्थिक वर्ष २०८२/८३ का लागि कृषिमा आधारित उद्योग, नागरिक सुरक्षाका लागि नविनतम बीमा कार्यक्रम र संस्थागत सुशासनमा केन्द्रित हुँदै आफ्नो वार्षिक नीति तथा कार्यक्रम सार्वजनिक गरेको छ। नगर प्रमुख पोतीलाल चौधरीले आईतबार सम्पन्न पन्ध्रौं नगर सभामा प्रस्तुत गर्नुभएको कार्यक्रमले पुराना र लोकप्रिय कार्यक्रमहरूलाई निरन्तरता दिँदै केही नयाँ र महत्वाकांक्षी योजनाहरू अघि सारेको हो।

सार्वजनिक नीतिमा कृषि क्षेत्रलाई उच्च प्राथमिकतामा राखिएको छ, जहाँ यस वर्ष पहिलो पटक स्थानीय उत्पादनको मूल्य शृङ्खला विकास गर्न कृषिमा आधारित उद्योग स्थापनामा विशेष जोड दिइएको छ। कार्यक्रम अनुसार, केराको थामबाट धागो र डोरी उत्पादन गर्ने तथा उखुबाट मिठाई र भेली बनाउने उद्योग स्थापना गरी स्थानीय रोजगारी सिर्जना गरिनेछ । गत वर्ष झैँ कृषकलाई ५० प्रतिशत अनुदानमा उन्नत बीउ तथा कृषि औजार वितरण कार्यक्रमलाई निरन्तरता दिइएको छ ।

कृषिमा आत्मनिर्भरता खोज्दै गर्दा नगरपालिकाले नागरिक सुरक्षा र विपद् जोखिम न्यूनीकरणका लागि पनि उत्तिकै महत्वाकांक्षी र नवीन कार्यक्रमहरू अघि सारेको छ। विपद् व्यवस्थापनलाई प्रभावकारी बनाउन आगामी आर्थिक वर्षदेखि नगरपालिकाका जनप्रतिनिधि र कर्मचारीको १ दिन बराबरको तलब विपद् कोषमा जम्मा गर्ने नीति लिइएको छ । यसका साथै, जोखिममा रहेका वडा २, ५, ६, ८, ९ र १० मा “विपद् घर बिमा” कार्यक्रम सञ्चालन गरिनेछ भने नगरपालिकाभित्रका सबै घरधुरीमा “एक घर एक म्यादी बिमा कार्यक्रम” लागू गर्ने महत्वाकांक्षी योजना छ । दोंदा र सुतिया नदीमा बाढीको पूर्वसूचना प्रणाली जडान गर्ने योजना पनि अघि सारिएको छ ।

नागरिकको भौतिक सुरक्षासँगै शान्ति सुव्यवस्था र सुशासन प्रवर्द्धन गर्न नगरपालिकाले संस्थागत सुधारका कदम चाल्ने भएको छ। जसअन्तर्गत, शान्ति सुरक्षा र आन्तरिक मामिलालाई व्यवस्थित गर्न आगामी आर्थिक वर्षमा “नगर प्रहरी” गठन गरी परिचालन गरिनेछ । सेवा प्रवाहलाई छिटोछरितो बनाउन डिजिटल नागरिक बडापत्रको व्यवस्था गरिनेछ भने उत्कृष्ट करदाता र वडालाई सम्मान गर्ने नीति लिइएको छ ।

संस्थागत सुधारका अतिरिक्त सामाजिक क्षेत्र र पूर्वाधार विकासमा पनि नयाँ कार्यक्रमहरू थपिएका छन्। शिक्षा र स्वास्थ्य क्षेत्रमा बेलौरी नगरपालिकाको स्थायी बासिन्दा वा कर्मचारीले विद्यावारिधि (PHD) गरेमा प्रोत्साहन स्वरूप एकमुष्ट रु. १ लाख अनुदान दिइनेछ । “घरदेखि घाटसम्मका लागि शव वाहन” खरिद गरी निःशुल्क सञ्चालनमा ल्याइनेछ भने वडा नं. ७ र ९ मा बर्थिङ सेन्टर सञ्चालन गरिनेछ । गर्भवती र सुत्केरीलाई दिइँदै आएको पोषण खर्च कार्यक्रमले यस वर्ष पनि निरन्तरता पाएको छ । पूर्वाधारतर्फ, आगामी आर्थिक वर्षमा संघ, प्रदेश र नगरपालिकाको लगानीमा २५ कि.मी. सडक कालोपत्रे गर्ने लक्ष्य राखिएको छ । बेलौरी रिङ्गरोड र बेलौरी-कलुवापुर फोर लेन सडक निर्माणका लागि संघीय र प्रदेश सरकारसँग पहल गर्ने नीतिले निरन्तरता पाएको छ ।

समग्रमा, बेलौरी नगरपालिकाले आगामी आर्थिक वर्षका लागि ल्याएको नीति तथा कार्यक्रमले आर्थिक आत्मनिर्भरता, नागरिक सुरक्षा र प्रभावकारी सेवा प्रवाहमा जोड दिँदै समृद्ध नगर निर्माणको दिशामा अग्रसर हुने संकेत गरेको छ।