बेलौरी, कञ्चनपुर। नेकपाका प्रभावशाली नेता नारायणकाजी श्रेष्ठले आगामी प्रतिनिधि सभा निर्वाचन सर्लाही क्षेत्र नम्बर ३ बाट लड्ने भएका छन्। आफ्नो गृहजिल्ला गोरखा छोडेर नेता श्रेष्ठले यसपटक मधेस प्रदेशलाई आफ्नो चुनावी कर्मथलो बनाउने निर्णय गरेका हुन्।

श्रेष्ठको सचिवालय स्रोतले दिएको जानकारी अनुसार, उनी सर्लाही-३ बाट चुनाव लड्ने विषय निश्चित भइसकेको छ। उनको स्थायी निर्वाचन क्षेत्र गोरखा-२ भए पनि बदलिँदो राजनीतिक परिस्थिति र पार्टीको आन्तरिक रणनीतिका कारण उनले निर्वाचन क्षेत्र परिवर्तन गरेका हुन्। विगत केही समयदेखि नै उनी मधेसबाट चुनाव लड्ने चर्चा चलेको थियो, जसलाई अहिले उनको सचिवालयले पुष्टि गरेको छ।

विगतको संसदीय इतिहासलाई हेर्दा, २०७४ सालको निर्वाचनमा श्रेष्ठ गोरखा-२ मा तत्कालीन नयाँ शक्ति पार्टीका संयोजक डा. बाबुराम भट्टराईसँग पराजित भएका थिए। त्यसपछिको २०७९ को निर्वाचनमा भने सोही क्षेत्रबाट माओवादी केन्द्रका अध्यक्ष पुष्पकमल दाहाल ‘प्रचण्ड’ निर्वाचित भएका थिए। उक्त समयमा डा. भट्टराईले प्रचण्डलाई समर्थन गर्दै आफू उम्मेदवार नबन्ने घोषणा गरेका थिए। गोरखामा पार्टी अध्यक्षकै प्रभाव क्षेत्र कायम रहेकाले पनि श्रेष्ठले वैकल्पिक क्षेत्रका रूपमा सर्लाही रोजेको विश्लेषण गरिएको छ।

निर्वाचन आयोगको कार्यतालिका अनुसार प्रतिनिधि सभा सदस्य पदका लागि यही माघ ६ गते मनोनयन दर्ताको कार्यक्रम तय गरिएको छ। नेता श्रेष्ठको उम्मेदवारी पक्का भएसँगै सर्लाही क्षेत्र नम्बर ३ को चुनावी माहोल तातिएको छ भने मधेसमा माओवादी केन्द्रको उपस्थिति बलियो बनाउन उनको उम्मेदवारीले अर्थपूर्ण भूमिका खेल्ने अपेक्षा गरिएको छ।