दार्चुला।

नेपालीहरूको महान् चाड विजयादशमी २०८३ को पावन अवसर पारेर दार्चुलाको उकु महलस्थित वडा नम्बर ७ मा धरमपानी युवा समाजको आयोजनामा प्रथम खुल्ला क्रिकेट प्रतियोगिता आयोजना हुने भएको छ। ‘राष्ट्रका लागि खेल, देशका लागि खेल’ भन्ने मूल नाराका साथ आगामी असोज २८ गतेदेखि सञ्चालन हुन लागेको यस प्रतियोगिताले स्थानीय स्तरमा क्रिकेट खेलको विकास र प्रवर्द्धन गर्दै युवाहरूमा आपसी सद्भाव बढाउने लक्ष्य लिएको छ।

उकु महल क्रिकेट मैदानमा सञ्चालन हुने यस प्रतियोगितामा आठ ओभरको खेल प्रणाली लागू गरिनेछ। आयोजक संस्थाका अनुसार प्रत्येक टिममा नौ जना खेलाडी सहभागी हुन पाउनेछन्। खेललाई पूर्ण रूपमा मर्यादित, अनुशासित र विवादरहित बनाउन मैदानमा खटिने अम्पायरको निर्णय नै अन्तिम तथा सर्वमान्य हुने नियम तय गरिएको छ। स्थानीय स्तरमा रहेका खेल प्रतिभाहरूलाई बाहिर ल्याउन र खेल भावनाको विकास गर्न यस किसिमको कडा अनुशासनले मद्दत पुग्ने आयोजकको भनाइ छ।

प्रतियोगितामा उत्कृष्ट प्रदर्शन गर्ने खेलाडी र टिमलाई हौसला प्रदान गर्न आकर्षक पुरस्कारको व्यवस्था गरिएको छ। उपाधि विजेता टिमले नगद २१ हजार १११ रुपैयाँ प्राप्त गर्नेछ भने उपविजेता टिमलाई नगद ६ हजार १११ रुपैयाँ प्रदान गरिनेछ। यसैगरी प्रतियोगिता अवधिभर उत्कृष्ट खेल प्रदर्शन गर्ने एक जना खेलाडीलाई प्लेयर अफ द टुर्नामेन्ट घोषणा गर्दै नगद ५११ रुपैयाँ पुरस्कार दिइनेछ। प्रतियोगितामा भाग लिन इच्छुक क्लब तथा समूहले टिम दर्ताका लागि चार हजार ५५५ रुपैयाँ प्रवेश शुल्क बुझाउनुपर्ने आयोजक धरमपानी युवा समाजले जनाएको छ।