डडेलधुरा।  सुदूरपश्चिमको राजनीतिमा करिब साढे तीन दशकदेखि एकछत्र राज गर्दै आएको नेतृत्वमा आज एक ऐतिहासिक मोड आएको छ । विगत ३४ वर्षदेखि डडेलधुरा संसदीय निर्वाचन क्षेत्रबाट अविचलित रूपमा प्रतिनिधित्व गर्दै आएका नेपाली कांग्रेसका सभापति तथा पूर्व प्रधानमन्त्री शेरबहादुर देउवाको स्थानमा यसपटक पार्टीले युवा नेता नैनसिंह महरलाई उम्मेदवार बनाउने निर्णय गरेको छ ।

२०४८ सालको आम निर्वाचनदेखि लगातार डडेलधुराबाट विजयी हुँदै आएका देउवाको सट्टामा महरले टिकट पाउनुलाई नेपाली राजनीतिमा ‘पुस्तान्तरण’ को एक ठोस अभ्यासका रूपमा हेरिएको छ । नेपाल विद्यार्थी संघका पूर्व केन्द्रीय अध्यक्ष समेत रहेका महर सुदूरपश्चिमको शैक्षिक तथा राजनीतिक आन्दोलनमा स्थापित नाम हुन् । पार्टीको यो निर्णयसँगै डडेलधुरामा ‘देउवा युग’ को प्रत्यक्ष चुनावी प्रतिस्पर्धाबाट बहिर्गमन भएको छ भने नयाँ पुस्ताका लागि मार्गप्रशस्त भएको छ ।

लामो समयदेखि पार्टीभित्र नेतृत्व हस्तान्तरण र युवा सहभागिताको बहस चल्दै आएको सन्दर्भमा, कांग्रेसको गढ मानिने डडेलधुरामा गरिएको यो परिवर्तनले सुदूरपश्चिमको समग्र राजनीतिक समीकरणमा नयाँ तरंग पैदा गरेको छ । देउवाको राजनीतिक उत्तराधिकारीका रूपमा हेरिएका महरका लागि यो अवसर जति गौरवपूर्ण छ, देउवाको भारी विरासत जोगाउनु त्यति नै चुनौतीपूर्ण समेत हुनेछ