मीरा श्रेष्ठ,
कञ्चनपुर

गत शनिबार कृष्णपुर नगरपालिकामा छाउ बार्नको लागि भनेर छाउगोठमा बस्ने क्रममा कमला दमाईको मृत्युले देशभर छाउ प्रथाको विरुद्धमा मानवअधिकारकर्मी, महिला अधिकारवादी तथा बुद्धिजीविहरुको चौतर्फी विरोध भयो । तत्पश्चात् कृष्णपुर नगरपालिकाले छाउप्रथाको अन्त्यका लागि जनचेतनामूलक कार्यक्रमहरु गर्दै आएपनि प्रभावकारी हुन नसकेकोमा खेद व्यक्त गर्दै १५ दिनभित्र पालिकाभित्रका सम्पूर्ण छाउगोठ भत्काउने निर्णय गरेको सुचना दियो । कसैले छाउगोठ भत्काउन अस्वीकार गरे रु. १० हजार सम्म जरिवाना गराउने उक्त सुचनामा उल्लेख गरिएको थियो ।

यो सँगै हिजो अर्थात् असार ३० गते सोमबार कञ्चनपुर जिल्ला प्रशासनले जिल्लाका ९ वटै स्थानीय तहलाई पत्राचार गर्दै छाउगोठ भत्काउन निर्देशन दिएको छ । प्रशासनले परम्परागत रुपमा चलिरहेको कुप्रथा उन्मुलन गर्न विशेष अभियान सञ्चान गर्नुपर्ने टड्कारो आवश्यकता देखिएकाले छाउगोठ भत्काउने अभियान थालनी गर्नुपर्ने बतएको छ ।