मीरा श्रेष्ठ,

लामाो समयदेखि विशेषगरी तराई क्षेत्रमा मनसुन सक्रिया नहुँदा धान रोपाई शतप्रतिशत हुन नसकेको तथा रोपाई गरिएका खेतहरुमा समेत धाँजा फाटेको अवस्थामा अब भने राहत पुग्ने देखिएको छ । यद्यपि मधेश प्रदेशमा भने अझै भारी वर्षाको सम्भावना अत्यन्त न्यून रहेको नेपाल मौसम पूर्वानुमान महाशाखाले जनाएको छ ।

महाशाखाले आज साउन ४ गतेको पूर्वानुमान जारी गर्दै गण्डकी प्रदेश र लुम्बिनी प्रदेशका धेरै स्थान, मधेश प्रदेशका केहि स्थान तथा कोशी प्रदेश, बागमती प्रदेश र कर्णाली प्रदेशका एकदुई स्थानमा मेघ गर्जन र चट्यांग सहित हल्का देखि मध्यम वर्षा भईरहेको जनाएको छ । त्यसैगरि पानी पर्ने मौसम प्रणाली दक्षिण पश्चिम दिशामा फैलिने क्रममा रहेकोले सो क्षेत्र आसपासमा सावधानी अपनाउन समेत अनुरोध गरेको छ ।

त्यस्तै स्वतन्त्र ऊर्जा उत्पादकहरुको संस्था, नेपाल ईप्पानले समेत प्रेस विज्ञप्ती जारी गर्दै सम्पुर्ण जलविद्युत आयोजनालाई ३ दिन उच्च सतर्कता अपनाउन अनुरोध गरेको छ ।

मौसम विभागका अनुसार पुर्वका कोशी, तमोर, अरुण, तामाकोशी, दुधकोशी, कन्काई लगायत नदीहरुमा बाढी आउने सम्भावना अत्यधिक रहेको बताएको छ ।

त्यस्तै, आईतबार बेलुका काठमाडौँको बागमती नदीमा बाढी आउने र तल्ला तटीय क्षेत्र प्रभावित हुने र मंगलबार दिउँसो सम्ममा महाकाली नदीमा बाढी आई नदी तटिय क्षेत्रमा प्रभाव पार्ने सम्भावना रहेको जनाएको छ । तसर्थ महाकाली नदी क्षेत्रमा सोमबार र मंगलबार विशेष सतर्कता अपनाउनपर्ने बताएको छ ।