कञ्चनपुर, २ असार ।

सुदूरपश्चिम प्रदेश सरकारले आगामी आर्थिक वर्षका लागि ३७ अर्ब ७० करोड रुपैयाँ बराबरको वार्षिक बजेट प्रस्तुत गरेको छ । आर्थिक मामिलामन्त्री विक्रम सिंह धामीले सत्तापक्षीय दलहरूबीचको आन्तरिक विवादका कारण उत्पन्न गतिरोधका बीच सोमबार मध्यरातमा प्रदेश सभाको बैठकमा उक्त बजेट वक्तव्य प्रस्तुत गर्नुभएको हो ।

प्रस्तुत बजेटमा सरकारले मुख्य रूपमा कृषि, पर्यटन र पूर्वाधार विकासलाई प्राथमिकतामा राखेको जनाएको छ । विनियोजित बजेटको प्राथमिकताका क्षेत्रहरू सार्वजनिक गर्दै आर्थिक मामिलामन्त्री धामीले प्रदेशको आर्थिक समृद्धिका लागि कृषि र पर्यटन क्षेत्रको रूपान्तरणसँगै भौतिक पूर्वाधार निर्माणमा विशेष जोड दिइएको दाबी गर्नुभयो । यसैगरी प्रदेश सरकारले राष्ट्रसेवक कर्मचारीहरूको मनोबल उच्च बनाउने उद्देश्यले तलब भत्तामा १० प्रतिशतले वृद्धि गर्ने घोषणा समेत गरेको छ ।

राजनीतिक खिचातानीका कारण मध्यरातमा मात्र बजेट सार्वजनिक हुन सकेकाले मन्त्री धामीले मन्त्रालयगत विवरण भने बैठकमा प्रस्तुत गर्न सक्नुभएन । जसका कारण बजेटको विस्तृत खर्च योजना र कार्यक्रमिक रूपरेखा स्पष्ट हुन बाँकी नै रहेको छ ।

कुल विनियोजित बजेटको खर्च व्यहोर्ने स्रोततर्फ प्रदेश सरकारले आन्तरिक राजस्व परिचालनबाट १ अर्ब ७२ करोड रुपैयाँ संकलन हुने अनुमान गरेको छ । त्यसैगरी नेपाल सरकारबाट राजस्व बाँडफाँट भई प्राप्त हुने १० अर्ब २४ करोड ९२ लाख ६६ हजार रुपैयाँ र संघीय रोयल्टी बाँडफाँटबापत प्राप्त हुने ७ करोड रुपैयाँलाई स्रोतका रूपमा राखिएको छ ।

बजेटका अन्य स्रोतहरूमा नेपाल सरकारबाट प्राप्त हुने वित्तीय समानीकरण अनुदान ९ अर्ब ६ करोड ३३ लाख रुपैयाँ, ससर्त अनुदानतर्फ ६ अर्ब ३ करोड ५८ लाख रुपैयाँ, समपूरक अनुदानबापत ३८ करोड ८० लाख रुपैयाँ र विशेष अनुदानतर्फ ५२ करोड ७६ लाख रुपैयाँ प्राप्त हुने अनुमान गरिएको छ । चालु आर्थिक वर्ष २०८२/८३ को विनियोजनबाट बचत हुने ९ अर्ब ६५ करोड रुपैयाँलाई समेत आगामी वर्षको स्रोतमा व्यवस्थापन गरिएको आर्थिक मामिला मन्त्रालयले जनाएको छ ।