बेलौरी, कञ्चनपुर ।
कञ्चनपुरको बेलौरी नगरपालिका वडा नम्बर ८ स्थित टिसिएन बस्ती नजिक सम्भावित नदी कटान र बाढीको जोखिमलाई मध्यनजर गर्दै स्थानीय बासिन्दा र सुरक्षाकर्मीको संयुक्त प्रयासमा जैविक तटबन्ध निर्माण गरिएको छ ।
वर्षायामको सुरुवातसँगै उक्त क्षेत्रमा बाढी पस्ने तथा जमिन कटान गर्ने उच्च जोखिम रहेकाले जनधनको सुरक्षाका लागि पूर्वतयारी स्वरूप यो अभियान सञ्चालन गरिएको हो । तटबन्ध निर्माण कार्यमा बेलौरी नगरपालिकाको विपद् व्यवस्थापन शाखा, स्थानीय बासिन्दा, सशस्त्र प्रहरी बल र नेपाल प्रहरीले संयुक्त रूपमा श्रमदान गरेका थिए । बाहिरबाट ल्याइने महँगा निर्माण सामग्रीको सट्टा गाउँमै सहजै उपलब्ध हुने स्रोत र साधनको अधिकतम प्रयोग गरी वातावरणमैत्री जैविक तटबन्ध तयार पारिएको छ ।
स्थानीय स्रोत र साधनको उपयोग गर्दै गरिएको यस कार्यले विपद् व्यवस्थापनमा समुदायको अपनत्व बढाएको छ । महँगा ठेक्कापट्टाको पर्खाइमा नबसी सुरक्षा निकायसँगको सहकार्यमा जनता आफैँ अघि सरेर गरिएको यस श्रमदानलाई विपद् पूर्वतयारीको एक उत्कृष्ट नमुनाका रूपमा लिइएको छ । यस अभियानले समुदायमा आधारित विपद् व्यवस्थापनको महत्त्वलाई थप उजागर गरेको छ ।
सामूहिक प्रयासबाट सफलतापूर्वक सम्पन्न यस जैविक तटबन्धले टिसिएन बस्तीलाई सम्भावित बाढी तथा कटानको जोखिमबाट सुरक्षित बनाएको छ । विपद् जोखिम न्यूनीकरणका लागि बेलौरीमा देखाइएको स्थानीय तह, समुदाय र सुरक्षा निकायको यो सहकार्य सुदूरपश्चिम प्रदेशका अन्य जोखिमग्रस्त क्षेत्रका लागि पनि अनुकरणीय सिकाई बन्न सक्ने देखिन्छ ।
प्रतिक्रिया
सम्बन्धित खवर
