कञ्चनपुर, ४ वैशाख । कञ्चनपुर जिल्लाको बेलौरी नगरपालिकामा अवस्थित ऐतिहासिक कालिका मन्दिर परिसरमा नगर प्रमुख पोतिलाल चौधरीले ३७ फिट अग्लो शिव मूर्ति निर्माणको आज विधिवत रूपमा शिलान्यास गरेका छन्। नगरप्रमुखको प्रमुख आतिथ्यतामा धार्मिक परम्परा अनुसार पूजा-अर्चना गर्दै यो महत्वपूर्ण कार्यको सुरुवात गरिएको हो। मूर्तिको निर्माण कार्य अनुभवी मूर्तिकार महेन्द्र पुनले गर्नेछन्।

शिलान्यास कार्यक्रममा बोल्दै मन्दिर निर्माण समिति संयोजक प्रकाश राज पन्तले भने, “यो शिव मूर्ति हाम्रो नगरका लागि धार्मिक तथा पर्यटन दुवै दृष्टिले महत्त्वपूर्ण हुनेछ। यसले धार्मिक पर्यटन प्रवर्द्धनसँगै स्थानीय अर्थतन्त्रलाई पनि टेवा पुर्‍याउनेछ।”

यस अवसरमा नगरका धार्मिक अगुवा, समाजसेवीहरू,  मन्दिर समितिका महिला सदस्यहरू तथा स्थानीय भक्तजनहरूको  उपस्थिति रहेको थियो। सहभागीहरूले यो मूर्ति निर्माणले नगरमा धार्मिक आस्था र पर्यटकीय आकर्षण दुवैलाई वृद्धि गर्ने विश्वास व्यक्त गरे।

कार्यक्रममा सहभागी एक स्थानीय श्रद्धालुले भने, “हाम्रो नगरमा यति ठूलो र सुन्दर शिव मूर्ति निर्माण हुन लागेकोमा निकै खुसी छौँ। यसले हाम्रो धार्मिक आस्था अझ प्रगाढ बनाउनेछ।”

मूर्ति निर्माण कार्य छिट्टै सुरू गरिनेछ र निर्धारित समयमा नै सम्पन्न गरिने बताइएको छ। स्थानीय धार्मिक आस्था र पर्यटनलाई जोडेर निर्माण गर्न लागिएको यो शिव मूर्तिले कालिका मन्दिर क्षेत्रलाई थप आकर्षक धार्मिक गन्तव्य बनाउन सक्नेछ।