​बेलौरी, कञ्चनपुर, १२ जेठ ।

कञ्चनपुरको बेलौरीमा भारतबाट अवैध रूपमा भन्सार छली ल्याइएको चार क्विन्टल बोइलर कुखुरा र ढुवानीमा प्रयोग भएका चारवटा मोटरसाइकल प्रहरीले बरामद गरेको छ।

​इलाका प्रहरी कार्यालय बेलौरीबाट प्रहरी सहायक निरीक्षकको कमाण्डमा खटिएको प्रहरी गस्ती टोलीले आज बिहान साढे छ बजे बेलौरी नगरपालिका वडा नम्बर २ टेडुवा स्थित क्षेत्रबाट उक्त सामानहरू नियन्त्रणमा लिएको हो। भारतबाट नेपालतर्फ अवैध रूपमा भन्सार छली ल्याई बेवारिसे अवस्थामा छाडिएका मोटरसाइकल र बोइलर कुखुरा बरामद गरिएको इलाका प्रहरी कार्यालय बेलौरीका प्रहरी वरिष्ठ नायब निरीक्षक वीरसिंह धामीले जानकारी दिनुभयो।

​प्रहरीका अनुसार बरामद गरिएको चार क्विन्टल बोइलर कुखुराको अनुमानित बजार मूल्य एक लाख ५२ हजार रुपैयाँ रहेको छ। त्यस्तै, कुखुरा ढुवानीमा प्रयोग गरिएका से २ प ४४७६, म १ प २३८७, से २ प ८३१२ र म १ प ५०६४ नम्बरका चारवटा मोटरसाइकलको अनुमानित मूल्य चार लाख रुपैयाँ तोकिएको छ। बरामद गरिएका मोटरसाइकल र कुखुरासहित जम्मा पाँच लाख ५२ हजार रुपैयाँ बराबरको अवैध सामान आवश्यक कारबाहीका लागि इलाका प्रहरी कार्यालय बेलौरीमा ल्याएर राखिएको छ।

​बरामद गरिएका कुखुराहरूलाई सरोकारवाला निकाय, पशु क्वारेन्टाइन, स्थानीय उद्योग वाणिज्य संघका प्रतिनिधि र सञ्चारकर्मीहरूको रोहवरमा कार्यालय परिसरको खाली जमिनमा खाडल खनेर पुरेर नष्ट गरिएको छ।