धनगढी ।
सुदूरपश्चिम प्रदेशमा पछिल्लो समय देखिएको बजेट शून्यताको गम्भीर अवस्थालाई सम्बोधन गर्दै प्रदेश सरकारले बजेट निर्माण प्रक्रिया तत्काल अगाडि बढाउने भएको छ।
मुख्यमन्त्री तथा मन्त्रिपरिषद्को कार्यालयमा सम्पन्न सर्वदलीय बैठकले प्रदेशको रोकिएको बजेट निर्माणलाई शीघ्र गति दिने सर्वसम्मत निर्णय गरेको हो। प्रदेशसभामा प्रतिनिधित्व गर्ने सबै राजनीतिक दलका प्रमुख तथा प्रतिनिधिहरूको उपस्थिति रहेको उक्त छलफलमा बजेट अभावले विकास निर्माण र दैनिक प्रशासनिक कार्यमा पारेको नकारात्मक प्रभावबारे गम्भीर समीक्षा गरिएको थियो।
लामो समयसम्म बजेट शून्यता रहँदा प्रदेशका नागरिकले सास्ती खेप्नुपरेको र विकास आयोजनाहरू ठप्प भएको निष्कर्ष निकाल्दै दलहरूले यसलाई उच्च प्राथमिकतामा राखेका हुन्। प्रदेशको वर्तमान आर्थिक शिथिलतालाई समेत मध्यनजर गर्दै कानुनसम्मत रूपमा आवश्यक प्रक्रिया चाँडो पूरा गर्ने सहमति बैठकमा जुटेको छ।
यस सर्वदलीय सहमतिसँगै प्रदेश सरकारलाई नयाँ बजेट ल्याउन र रोकिएका आर्थिक गतिविधि सुचारु गर्न आवश्यक कानुनी बाटो खुलेको छ भने सुदूरपश्चिमका जनसमुदायमा विकास निर्माणले पुनः गति लिने आशा पलाएको छ।
प्रतिक्रिया
सम्बन्धित खवर
