दोधारा चाँदनी, कञ्चनपुर।

कञ्चनपुरको दोधारा चाँदनी नगरपालिकामा जग्गा सम्बन्धी पुरानो विवादका कारण एक व्यक्तिले आफ्नै सौतेनी आमाको धारिलो हतियार प्रहार गरी बीभत्स हत्या गरेका छन्। सोमबार राति भएको यस घटनामा अभियुक्तकी सहोदर बहिनी समेत गम्भीर घाइते भएकी छन्।

दोधारा चाँदनी नगरपालिका वडा नम्बर ४, माननीय चोक निवासी ५५ वर्षीय हरिप्रसाद श्रेष्ठले ७५ वर्षीया सौतेनी आमा बिन्द्रा श्रेष्ठमाथि धारिलो हतियार प्रहार गरेको प्रहरीले जनाएको छ। हतियार प्रहारबाट गम्भीर घाइते भएकी बिन्द्राको घटनास्थलमै मृत्यु भएको हो। सोही क्रममा बीचबचाउ गर्न पुगेकी ५० वर्षीया बहिनी भगवती देवी माझीलाई समेत श्रेष्ठले आक्रमण गरेका थिए। विवाहित भए पनि माइतीमै बस्दै आएकी माझीको टाउको र दाहिने हातमा गहिरो चोट लागेको छ।

घाइते माझीको अवस्था गम्भीर रहेकाले उनलाई तत्काल उद्धार गरी उपचारका लागि महेन्द्रनगरस्थित महाकाली प्रादेशिक अस्पताल पठाइएको छ। घटनालगत्तै अभियुक्त हरिप्रसाद श्रेष्ठ फरार भएका छन्। प्रहरीले उनको खोजीका लागि जिल्लाभरि सुरक्षा टोली परिचालन गरेको र सीमा नाकाहरूमा समेत निगरानी बढाएको छ।

प्रारम्भिक अनुसन्धानका क्रममा मृतक बिन्द्रा, घाइते भगवती र अभियुक्त हरिप्रसादबीच लामो समयदेखि जग्गा जमिनको बाँडफाँटलाई लिएर विवाद चल्दै आएको खुलेको छ। सोही रिसिइबीका कारण श्रेष्ठले परिवारमाथि नै साङ्घातिक आक्रमण गरेको छिमेकीहरूको भनाइ छ।

जिल्ला प्रहरी कार्यालय कञ्चनपुरले घटनास्थलको मुचुल्का तयार गरी घटनाको सुक्ष्म अध्ययन सुरु गरेको छ। घरायसी विवादले उग्र रूप लिँदा घटेको यस दुःखद घटनाले स्थानीय समुदाय स्तब्ध बनेको छ।