काँकरभिट्टा, झापा
राजस्व चुहावट नियन्त्रण गर्ने उद्देश्यले सशस्त्र प्रहरी बलले पूर्वी नाका काँकरभिट्टा लगायत झापाका प्रमुख सीमा नाकाहरूमा कडाइ सुरु गरेको छ। सीमावर्ती भारतीय बजारबाट एक सय रुपैयाँभन्दा बढी मूल्यको सामान ल्याउँदा अब अनिवार्य रूपमा भन्सार महसुल बुझाउनुपर्ने व्यवस्था कार्यान्वयनमा ल्याइएको हो।
विशेषगरी मेचीनगर, भद्रपुर, गौरीगञ्ज र कचनकवल जस्ता सीमावर्ती क्षेत्रका बासिन्दाहरू खाद्यान्न, लत्ताकपडा र घरायसी सामग्रीका लागि भारतीय बजारमा निर्भर रहँदा स्थानीय बजार सुस्ताएको र राज्यले ठूलो मात्रामा राजस्व गुमाइरहेको गुनासो बढेपछि यो कदम चालिएको हो। सशस्त्र प्रहरी बल नेपाल नम्बर २ गण हेडक्वाटर झापाका सूचना अधिकारी मदन रसाइलीका अनुसार, सर्वसाधारणलाई भन्सार महसुल नबुझाई सामान नल्याउन सूचित गर्ने काम भइरहेको छ।
गृह मन्त्रालयको प्रत्यक्ष निर्देशनपछि सशस्त्र प्रहरीले सीमा क्षेत्रमा सचेतनामूलक कार्यक्रमहरूसँगै निगरानीलाई तीव्र बनाएको छ। सूचना अधिकारी रसाइलीले भन्सार महसुल नबुझाई ल्याइएका सामानहरू कानुनबमोजिम जफत गरी कारबाही प्रक्रिया अघि बढाइने जानकारी दिनुभयो।
सशस्त्र प्रहरीले झापाका यी नाकाहरूमा गरेको कडाइलाई देशभरका अन्य सीमा नाकाहरूमा पनि राजस्व चुहावट रोक्ने नमुना प्रयासका रूपमा हेरिएको छ। यो नियम कडाइका साथ लागू हुँदा अवैध आयात निरुत्साहित हुने र स्वदेशी बजार चलायमान हुने अपेक्षा गरिएको छ।
यस व्यवस्थाले दैनिक उपभोग्य वस्तुका लागि सीमापारि जाने सर्वसाधारणलाई केही प्रभाव पारे पनि दीर्घकालीन रूपमा राष्ट्रिय अर्थतन्त्र र स्थानीय व्यापार प्रवर्द्धनमा सकारात्मक योगदान पुग्ने विश्वास लिइएको छ। सरकारले देशभरका अन्य नाकाहरूमा पनि यसैगरी निगरानी बढाउने तयारी गरेको छ।
प्रतिक्रिया
सम्बन्धित खवर
