बेलौरी, कञ्चनपुर।

कञ्चनपुरको बेलौरीमा यही असार ३१ गते अवैध रूपमा भन्सार छली ल्याइएको ठूलो परिमाणको पेय पदार्थ र ओसारपसारमा प्रयोग गरिएका साइकलसहित प्रहरीले तीन जनालाई नियन्त्रणमा लिएको छ। विशेष सूचनाका आधारमा खटिएको प्रहरी टोलीले बेलौरी नगरपालिका वडा नम्बर ५ रामनगरस्थित सडक खण्डबाट उनीहरूलाई नियन्त्रणमा लिएको हो।

प्रहरीका अनुसार भारतबाट अवैध रूपमा भन्सार छली ल्याइएका ८१ बोतल अखाद्य पेय पदार्थ बरामद गरिएको छ, जसमा ७३ बोतल डिउ र ८ बोतल स्प्राइट रहेका छन्। बरामद गरिएका उक्त सामग्रीहरू र सो कार्यमा प्रयोग गरिएका दुई थान साइकलको कुल बजार मूल्य करिब २० हजार २०० रुपैयाँ बराबर रहेको प्रहरीले मुल्याङ्कन गरेको छ। प्रकृतिका आधारमा ती पेय पदार्थहरू अवैध रूपमा बजारमा बिक्री वितरणका लागि लुकाइछिपाई ल्याइँदै गरेको अवस्थामा फेला पारिएको थियो।

पक्राउ पर्नेहरूमा बेलौरी नगरपालिका वडा नम्बर ५ रामनगर बस्ने ३८ वर्षीय जोगराज चौधरी, पुनर्वास नगरपालिका वडा नम्बर १ बस्ने ४६ वर्षीया शान्ति तामाङ र सोही स्थानकी ३५ वर्षीया सरिता तामाङ रहेका छन्। इलाका प्रहरी कार्यालयबाट खटिएको विशेष टोलीले उनीहरूलाई सामग्रीसहित नियन्त्रणमा लिएर थप कानुनी प्रक्रिया अघि बढाएको थियो।

नियन्त्रणमा लिइएका तीनै जनासहित बरामद गरिएका पेय पदार्थ र साइकललाई आवश्यक कानुनी कारबाहीका लागि भन्सार कार्यालयमा बुझाइएको जिल्ला प्रहरी कार्यालय कञ्चनपुरले जनाएको छ।