धनगढी, कैलाली।

कञ्चनपुरको बेलौरी नगरपालिका वडा नम्बर ६, रिछाहा टोलको समग्र विकास तथा धार्मिक स्थलहरूको भौतिक स्तरोन्नतिका लागि स्थानीय राना समुदायका अगुवाहरूले सुदूरपश्चिम प्रदेश सरकारको गम्भीर ध्यानाकर्षण गराएका छन्।

नेपाली कम्युनिष्ट पार्टीका प्रदेश कमिटी सदस्य नन्दु राना र सोही पार्टीका बेलौरी नगर कमिटी सदस्य लच्छु रानाको नेतृत्वमा राजधानी धनगढी पुगेको प्रतिनिधिमण्डलले प्रदेश सरकारका उच्च पदस्थ अधिकारीहरूलाई भेटेर ज्ञापनपत्र बुझाएको हो। स्थानीय स्तरमा राना समुदायको अगुवाइ गर्दै आउनुभएका उहाँहरूले आफ्नो वडामा रहेका विभिन्न सडक खण्डको मर्मत तथा निर्माण र मठमन्दिरको संरक्षणका लागि आवश्यक बजेट विनियोजन गर्न जोडदार माग गर्नुभएको छ।

ध्यानाकर्षण पत्रमार्फत भुइँया मन्दिर व्यवस्थापन समितिका सहसचिवसमेत रहनुभएका नन्दु रानाले रिछाहा टोलस्थित ऐतिहासिक भुइँया मन्दिरको भौतिक स्तरोन्नतिको मुद्दालाई प्रमुखताका साथ उठाउनुभएको छ। त्यसैगरी, राधाकृष्ण मन्दिरका सल्लाहकार सदस्य रहनुभएका लच्छु रानाले वडा नं. ६ स्थित राधाकृष्ण मन्दिरको संरक्षण र विकासका लागि प्रदेश सरकारको तर्फबाट विशेष पहल हुनुपर्ने माग राख्नुभएको छ।

विकास निर्माणका यी एजेन्डासहित प्रतिनिधिमण्डलले सुदूरपश्चिम प्रदेशका मुख्यमन्त्री खगराज भट्टलाई प्रत्यक्ष भेटेर ज्ञापनपत्र हस्तान्तरण गरेको छ। मुख्यमन्त्री भट्टसँगको भेटघाटमा बेलौरीको पूर्वाधार विकास र धार्मिक पर्यटन प्रवर्द्धनका विषयमा गहन छलफल भएको थियो।

यसका साथै, उहाँहरूले प्रदेशका भौतिक पूर्वाधार राज्यमन्त्री जानकी पौडेल कुँवरलाई भेटेर बाटोघाटो निर्माण र मन्दिरको भौतिक संरचना सुधारका विषयमा ध्यानाकर्षण गराउनुभएको छ। त्यसैगरी, आर्थिक मामिला राज्यमन्त्री जानकी ऐर बम र उद्योग, पर्यटन तथा वन राज्यमन्त्री इन्दिरा गिरीलाई समेत छुट्टाछुट्टै भेटेर धार्मिक वन तथा पर्यटन प्रवर्द्धन र आवश्यक बजेट व्यवस्थापनका लागि आग्रह गरिएको छ। सोही क्रममा प्रतिनिधिमण्डलले सुदूरपश्चिम प्रदेश नीति तथा योजना आयोगका उपाध्यक्ष गोकर्ण भट्टलाई समेत भेटेर बेलौरीको समग्र विकास निर्माण र योजना तर्जुमाका विषयमा ध्यानाकर्षण गराउँदै गम्भीर छलफल गरेको छ।

भेटका क्रममा मुख्यमन्त्री, मन्त्रीहरू तथा योजना आयोगका उपाध्यक्षबाट बेलौरीको विकास निर्माण र धार्मिक क्षेत्रको स्तरोन्नतिका लागि प्रदेश सरकार सकारात्मक रहेको र आगामी कार्यक्रममा उक्त मागहरूलाई प्राथमिकताका साथ सम्बोधन गर्ने आश्वासन प्राप्त भएको बताइएको छ।

राजनैतिक तथा सामाजिक वृत्तमा सक्रिय यी दुई नेताको यस पहलले बेलौरीका बासिन्दामा विकासको नयाँ आशा पलाएको छ। स्थानीय जनभावना र आवश्यकतालाई प्रदेशको नीति निर्माण तहसम्म पुर्‍याउन गरिएको यस कदमलाई स्थानीयले निकै सकारात्मकरुपमा लिएका छन्।