बेलौरी, कञ्चनपुर।

बेलौरी उद्योग वाणिज्य संघको आगामी असार २० गते शनिबार पाँचौँ वार्षिक साधारण सभा एवं चुनावी अधिवेशन हुने भएको छ। वर्तमान कार्यसमितिको नियमित कार्यकाल गत वैशाख महिनामै समाप्त भइसकेको अवस्थामा विधानतः ६ महिनाको म्याद थप गरिएपछि आगामी असोजभित्र अनिवार्य रूपमा नयाँ नेतृत्व चयन गर्नुपर्ने वैधानिक बाध्यताका बीच संघले चुनावी साधारण सभा आह्वान गरेको हो।

संघका महासचिव गोविन्द प्रसाद सापकोटाद्वारा जारी गरिएको अत्यन्त जरुरी सूचना अनुसार आगामी साधारण सभामा सहभागी हुन र नेतृत्व चयनको प्रक्रियामा भाग लिनका लागि साधारण सदस्यहरूले यही असार १५ गतेभित्र अनिवार्य रूपमा आफ्नो सदस्यता नवीकरण गरिसक्नुपर्नेछ। तोकिएको समयसीमाभित्र संघको कार्यालयमा उपस्थित भई सदस्यता नवीकरण नगर्ने सदस्यहरू साधारण सभामा सहभागी हुन पाउने छैनन्।

यसैबीच, वर्तमान कार्यसमितिको म्याद थपिएर आगामी असोज महिनासम्म मात्र बाँकी रहेकाले यस पटकको साधारण सभालाई पूर्ण रूपमा चुनावी अधिवेशनकै रूपमा अगाडि बढाइने संघका अध्यक्ष हिरा सिंह विष्टले जानकारी दिनुभएको छ। प्रचलित वैधानिक व्यवस्था अनुसार निर्वाचन हुनुभन्दा कम्तीमा ४५ दिन अगावै निर्वाचन आयोग वा मण्डल गठन गरिसक्नुपर्ने प्रावधान रहेकाले साधारण सभाबाटै यसको विधिवत प्रक्रिया आरम्भ गरिने अध्यक्ष विष्टले स्पष्ट पार्नुभयो।

साधारण सभाको बन्द सत्रमा स्थानीय व्यवसायी र प्रतिनिधिहरूबीच सहमति जुटेको खण्डमा नयाँ कार्यसमिति सर्वसम्मत रूपमा चयन हुने विकल्प पहिलो प्राथमिकतामा रहने अध्यक्ष हिरा सिंह विष्टले जानकारी दिनुभएको छ। तर सहमति हुन नसकेको अवस्थामा साधारण सभाले तत्कालै एक वैधानिक निर्वाचन मण्डलको गठन गर्ने र उक्त मण्डलले आवश्यक कानुनी प्रक्रिया एवं चुनावी कार्यतालिका तय गरी असोज महिनाभित्रै लोकतान्त्रिक पद्धतिबाट निर्वाचन सम्पन्न गराउने गरी तयारी अगाडि बढाइएको छ।

कञ्चनपुरको दक्षिणी क्षेत्रकै प्रमुख व्यापारिक एवं आर्थिक केन्द्रका रूपमा रहेको बेलौरीमा उद्योग वाणिज्य संघको चुनावी अधिवेशनको मिति निश्चित भएसँगै स्थानीय व्यवसायीहरू माझ नयाँ नेतृत्वका लागि आन्तरिक गृहकार्य, सम्भावित प्यानल निर्माण र चुनावी सरगर्मी निकै तीव्र बन्ने अपेक्षा गरिएको छ।